Япон улсын Айчи Боловсролын Их Сургуулийн дэд захирал Иваяама багш, Японы дунд, ахлах сургуулийн багш нар болон тус их сургуульд багш мэргэжлээр суралцаж буй IV курсийн оюутнаас бүрдсэн баг Уудам Монгол сургуульд зочилж, хоёр өдрийн хөтөлбөр хэрэгжүүллээ.
Зочид манай сургуулийн 3–11 дүгээр ангийн сонгогдсон ангиудын хичээлд сууж, сургалтын үйл ажиллагаатай танилцан ажиглалт хийсэн юм.
Үүний зэрэгцээ сурагчдад зориулан Япон орны уламжлалт тоглоом, соёлтой танилцах үйл ажиллагаа, физикийн сонирхолтой туршилт хичээлүүдийг зохион байгууллаа.
Хүүхдүүд маань Японы багш, ирээдүйн багш болохоор суралцаж буй оюутнуудтай шууд харилцаж, хамтран ажиллан, туршилт хийж, Япон орны боловсрол, соёлыг анги танхимдаа ойроос мэдрэх боломжтой байлаа.
Манай сургуулийн хувьд гадаад харилцаа гэдэг зөвхөн гэрээ байгуулж, харилцан айлчлал хийх төдий зүйл биш. Харин тэр харилцаа нь хүүхдийн анги танхимд орж ирж, шинэ хүнтэй уулзах, өөр соёлтой танилцах, өөр аргаар суралцах, дэлхийг арай өргөнөөр харах бодит боломж болон хүрч байх нь хамгийн чухал гэж бид үздэг.
Энэ удаагийн хоёр өдрийн хөтөлбөр ч ийм боломжуудын нэг байлаа.
Хоёр өдрийн турш сурагчидтай маань мэдлэг, туршлагаа хуваалцаж, сонирхолтой хичээл, үйл ажиллагаа зохион байгуулсан Айчи Боловсролын Их Сургуулийн төлөөлөгчид, хүрэлцэн ирсэн багш, оюутнууддаа чин сэтгэлийн талархал илэрхийлье.
Цаашдын хамтын ажиллагаа маань багш, оюутан, сурагчдын харилцан суралцах илүү олон боломж болон өргөжинө гэдэгт итгэлтэй байна.
