Уудам Монгол сургууль дунд хугацааны “UUDAM MONGOL 3.0” стратеги төлөвлөгөөнийхөө хүрээнд Хөтөлбөр, Орчин, Хүний нөөцийн олон шинэчлэлийг эхлүүлээд байна.
Үүний нэг нь өдөр тутмын амьдралд шаардлагатай найман чиглэлийн мэдлэгийг олгох зорилготой “Амьдралын боловсрол” хөтөлбөр юм.
Найман чиглэлтэй энэхүү хөтөлбөрийн онцлог нь хүүхэд нас, түвшиндээ тохирсон агуулгаар өдөр тутмын амьдралд хэрэгтэй мэдлэгээ бодит сонголт, дадал, чадвар болгон хөгжүүлэхэд оршино. Өөрийгөө ойлгодог, бусадтай зөв харилцдаг, бие дааж шийдвэр гаргадаг, хариуцлагатай хүн болж төлөвшихөд нь дэмжлэг үзүүлэхийг бид зорьж байна.
Иргэний оролцоо
“Би орчноо илүү сайхан болгохын тулд юу хийж чадах вэ?”
Ангийнхаа ажлыг хамтдаа төлөвлөх, сургуулийн орчинд анзаарсан асуудлаа хэлэх, нийтийн эд зүйлийг гамнах. Хүүхэд өөрийн санал, жижиг үйлдлээрээ хамт олондоо хувь нэмэр оруулж чадна. Бусдын саналыг сонсож, хамтын шийдвэрт оролцож, хариуцсан ажлаа хийж сурах нь иргэний оролцооны эхлэл юм.
Хүүхдүүд нас, түвшиндээ тохирсон агуулгаар өөрийн болон бусдын эрх, үүргийг ойлгож хүндэтгэх, ангийн болон сургуулийн амьдралд саналаа илэрхийлж бусдын саналыг сонсох, орчиндоо тулгамдсан асуудлыг анзаарч шийдэх боломжийг хамтдаа эрэлхийлэх, нийтийн сайн сайхны төлөөх ажилд оролцож хүлээсэн үүргээ хариуцлагатай биелүүлэхэд суралцана.
Бид хүүхэд орчиндоо санаа тавьдаг, эрхээ мэддэг, бусдын эрхийг хүндэтгэдэг, саналаа үндэслэлтэй илэрхийлж, хамтын ажилд бодит хувь нэмэр оруулдаг хариуцлагатай иргэн болж төлөвшихөд нь дэмжлэг үзүүлэхийг зорьж байна. Хамтын орчиндоо санаа тавих нь өөрийн хийж чадах жижиг ажлаас эхэлдэг.
Гэртээ хүүхэдтэйгээ орчныхоо тухай ярилцаад үзээрэй: “Манай байр, гудамж эсвэл сургуульд юуг сайжруулж болох вэ? Бид хамтдаа ямар жижиг ажил хийж чадах бол?”
