Манай сургуульд Япон Улсын 公益財団法人 安田奨学財団 / Yasuda Scholarship Foundation-ийн төлөөлөгчид хүрэлцэн ирж, цаашдын хамтын ажиллагаа, сурагчдын тэтгэлгийн боломжийн талаар дэлгэрэнгүй уулзалт хийлээ.
安田奨学財団 нь 2005 онд байгуулагдсан, Япон Улсад суралцаж буй гадаад оюутнууд болон ирээдүйтэй залуусын боловсролыг дэмжих чиглэлээр олон жилийн турш үйл ажиллагаа явуулж ирсэн нийтийн ашиг сонирхлын сан юм. Тус сан Монгол Улстай урт хугацааны хамтын ажиллагааны туршлагатай бөгөөд монгол оюутнуудад Японд суралцах тэтгэлэг олгож ирсэн.
Уулзалтаар манай сургуулийн япон хэлний сургалт, Японы сургууль, боловсролын байгууллагуудтай хэрэгжүүлж ирсэн солилцоо, богино болон урт хугацааны хөтөлбөрүүд, ялангуяа Японы ахлах сургуульд шилжин суралцах хөтөлбөрийн үр дүн, цаашдын хөгжлийн талаар танилцуулж, санал солилцлоо.
Уулзалтын үр дүнд эхний ээлжид дараах хамтын ажиллагааг хэрэгжүүлэхээр урьдчилсан тохиролцоонд хүрлээ: манай сургуулийн Японы ахлах сургуульд шилжин суралцах хөтөлбөрт тэнцэн, Японд үргэлжлүүлэн суралцаж буй сурагчдаас тодорхой шалгуурын дагуу сонгон шалгаруулж, улмаар Японы их, дээд сургуульд элсэн орсон тохиолдолд 4 жилийн хугацаанд сар бүр 100,000 иений тэтгэлэг авах боломжийг бүрдүүлнэ.
Өөрөөр хэлбэл, манай сурагчдын хувьд «Уудам Монгол → Японы ахлах сургууль → Японы их, дээд сургууль → тэтгэлэгтэйгээр дээд боловсрол эзэмших» урт хугацааны боловсролын замнал улам бодитой болж байна.
Цаашид тэтгэлгийн сонгон шалгаруулалтын шалгуур, хамрах хүрээ, хэрэгжүүлэх журмыг 安田奨学財団-тай нарийвчлан тохирч, албан ёсоор баталгаажсаны дараа сурагч, эцэг эхчүүддээ дэлгэрэнгүй мэдээлэх болно.
