Уудам Монгол сургуулийн сагсан бөмбөгийн хөгжлийн шинэ үе эхэлж байна.
Өнгөрсөн хичээлийн жилд манай сургуулийн сагсан бөмбөгийн баг Ulaanbaatar Cup тэмцээнд дүүргийн аваргаар шалгарч, нийслэлийн шатанд хүрэл медаль хүртсэн амжилтаар улирлаа өндөрлөсөн.
Энэхүү амжилтыг нэг удаагийн үр дүнгээр үлдээхгүй, сурагчдын сагсан бөмбөгийн ур чадварыг системтэй хөгжүүлэх, сургуулийн шигшээ багийг тогтвортой бэлтгэх зорилгоор шинэ хичээлийн жилээс эхлэн мэргэжлийн багштай хамтран «UM KIZUNA Basketball Club» байгуулахаар төлөвлөж байна.
KIZUNA (絆) гэдэг нь япон хэлээр хүмүүсийн хоорондын бат бөх холбоо, итгэлцэл, нөхөрлөл гэсэн утгатай. Энэ нь сагсан бөмбөгөөр дамжуулан хүүхдүүддээ төлөвшүүлэхийг зорьж буй багийн ажиллагаа, сахилга бат, харилцан хүндлэл, хамтын зорилго гэсэн үнэт зүйлсийг илэрхийлнэ.
2026–2027 оны хичээлийн жилд клубийн үйл ажиллагааг сагсан бөмбөгийн дугуйлан (7 хоногт 3 удаа) болон сургуулийн шигшээ баг (7 хоногт 3 удаа) гэсэн хоёр үндсэн чиглэлээр зохион байгуулна. Үүнээс нэг өдөр нь дугуйлан болон шигшээ баг хамтарсан бэлтгэл хийж, сурагчид нэгнээсээ суралцах, дараагийн үеийн шигшээ тамирчдыг бэлтгэх тогтолцоог бүрдүүлнэ.
Энэ хичээлийн жилд сургалтын шаардлага хангасан спорт заалтай гэрээ байгуулан тогтмол бэлтгэл хийхээр төлөвлөж байгаа бөгөөд сургуулийн өргөтгөлийн ажил шийдэгдсэний дараа өөрийн спорт зааланд тогтмол үйл ажиллагаа явуулах урт хугацааны зорилготой.
Бидний зорилго зөвхөн тэмцээнд медаль авах биш. Сагсан бөмбөгөөр хичээллэх дуртай хүүхдэд хөгжих боломжийг, авьяастай хүүхдэд шигшээ багт дэвших замыг, шигшээ багийн тамирчинд илүү өндөр түвшинд өрсөлдөх боломжийг бий болгоно.
