Уудам Монгол сургуулийн нэг сайхан уламжлал гурав дахь жилдээ үргэлжилж байна.
Манай сургуулийн шилжин суралцах хөтөлбөрөөр Япон Улсад суралцаж, өдгөө их сургуульд боловсролоо үргэлжлүүлж буй төгсөгч ах, эгч нар нь жил бүр 10 дугаар ангид дэвшин суралцаж буй дүү нарынхаа дунд эссэ бичлэгийн уралдаан зарлаж, шалгарсан хоёр сурагчийн сургалтын төлбөрийг тус бүр 50 хувиар хөнгөлдөг.
Энэ тэтгэлгийн үнэ цэнэ нь зөвхөн сургалтын төлбөрийн хөнгөлөлтөд биш. Өмнө нь энэ сургуулийн ширээнд сууж, өөрсдөө мөрөөдлөө тээж явсан сурагчид өнөөдөр дараагийн үеийн дүү нарынхаа мөрөөдлийг дэмжиж байгаад оршдог.
Энэ жилийн «Төгсөгчдийн нэрэмжит тэтгэлэг»-т 10Б ангийн сурагч О.Сэтгэлтөгөлдөр шалгарч, Японд суралцаж буй төгсөгч ах, эгч нарынхаа дэмжлэгээр сургалтын төлбөрийн 50 хувийн тэтгэлэг хүртлээ.
Тэрээр «Миний мөрөөдөл» эссэдээ ээжийнхээ яриагаар дамжуулан Япон орон, япон хэл, соёлыг сонирхох болсон түүх, ирээдүйд архитектор инженер мэргэжил эзэмшиж, Монголдоо хүүхдийн парк барьж байгуулах мөрөөдлийнхөө тухай өгүүлжээ.
«Надад бас нэгэн хүсэл бий. Тэр нь ээжийнхээ энэ ачаанаас бага ч болов хөнгөлөх» гэж О.Сэтгэлтөгөлдөр бичжээ.
