Хэрэглэхээ больсон зүйл хэн нэгэнд хэрэгтэй зүйл байж болно. Харин хэрэггүй болсон бүхнээ хаях биш, дахин ашиглаж, бусадтай хуваалцаж сурах нь хүүхдүүдэд багаас нь суулгахыг хүсдэг зөв дадлуудын нэг юм.
Энэ зорилгын хүрээнд өнгөрсөн баасан гарагт сурагчдынхаа дунд «Өгөөмөр найзууд» уламжлалт өдөрлөгөө зохион байгууллаа.
Өдөрлөгөөр сурагчид хэрэглэдэггүй ч цэвэр, ашиглах боломжтой ном, дэвтэр, үзэг, цүнх, хувцас зэрэг эд зүйлсээ авчран хоорондоо солилцож, хэрэгтэй нэгэндээ бэлэглэлээ.
Мөн сурагчид өөрсдийн мэдрэмж, бодлоо чөлөөтэй илэрхийлэх сэтгэл зүйн буланд оролцож, «Хуучин өөрийгөө үдэх» захидал бичиж, бие биедээ урам зориг, сайхан үгс бүхий сэтгэлийн захидал илгээлээ.
Дуулж, бүжиглэж, өөрсдийн авьяас чадвараа бусадтайгаа хуваалцан нэг өдрийг инээд баясал, эерэг мэдрэмжээр дүүрэн өнгөрүүллээ.
Бид хүүхдүүддээ байгаль дэлхийгээ хайрлаарай гэж хэлэхээс гадна хэрэглээгээ зөв зохицуулж, дахин ашиглаж, хуваалцаж сургах хэрэгтэй. Бусдыг ойлгоорой гэж хэлэхээс гадна өөрийнхөө мэдрэмжийг зөв илэрхийлж, бусдын мэдрэмжийг сонсож сурах боломжийг нь бас бий болгох хэрэгтэй.
«Өгөөмөр найзууд» өдөрлөгийн хамгийн сайхан үр дүн нь хэдэн эд зүйл солилцсонд биш. Хүүхдүүд маань хуваалцах, дахин ашиглах, өөрийгөө илэрхийлэх, бие биенээ сонсож дэмжих гэдгийг нэг өдрийн турш өөрсдөө хийж үзсэнд оршиж байна.
Амьдралын боловсрол заримдаа хичээлийн ширээний ард биш, ийм өдрүүдэд илүү сайн тогтдог.
