Уудам Монгол сургуульд Япон улсын License Academy компанийн захирал Арита Маки, гадаад харилцааны менежер Үчида Такүжи нар зочилж, сургуулийн орчин, сургалтын үйл ажиллагаатай танилцлаа.
License Academy нь Япон улсын ахлах сургуулийн сурагчдад их, дээд сургууль, мэргэжлийн сургууль болон ажлын байр, мэргэжил сонголтын мэдээлэл хүргэх чиглэлээр олон жилийн турш ажиллаж ирсэн байгууллага бөгөөд 2024 онд байгуулагдсаны 50 жилийн ойгоо тэмдэглэсэн. Тус компанийн мэдээлснээр Япон даяар ахлах сургуулиудад жилд 6,000 гаруй удаагийн мэргэжил, боловсролын чиг баримжаа олгох арга хэмжээ зохион байгуулж, 1.15 сая орчим сурагчид хүрч ажилладаг байна.
Мөн тус компани олон улсын боловсролын чиглэлээр үйл ажиллагаагаа өргөжүүлж, Японд суралцах болон ажиллах сонирхолтой гадаадын залууст зориулсан боловсрол, ажил мэргэжлийн үзэсгэлэн зохион байгуулдаг бөгөөд Улаанбаатар хотод өөрийн төлөөлөгчийн газартай.
Төлөөлөгчид Улаанбаатар хотод зохион байгуулагдах «Let’s Study in Japan» боловсролын үзэсгэлэнтэй холбогдуулан Монгол Улсад хүрэлцэн ирсэн бөгөөд тус үзэсгэлэнд Японы их, дээд сургууль, мэргэжлийн болон хэлний бэлтгэлийн сургуулиудын багш, төлөөлөгчид оролцож сургуулиудаа танилцуулах юм.
Уулзалтын үеэр Уудам Монгол сургуулийн үүсэл хөгжил, боловсролын үзэл санаа, Япон улстай хөгжүүлж ирсэн хамтын ажиллагаа, сурагчдын цаашдын боловсролын боломжийн талаар танилцуулав.
Мөн License Academy-аас Монгол Улсад зохион байгуулдаг боловсролын үзэсгэлэн, мэргэжил сонголтын арга хэмжээг цаашид Уудам Монгол сургууль дээр хамтран зохион байгуулж, сурагчдад Японы их, дээд болон мэргэжлийн сургуулиудтай сургууль дээрээ шууд танилцах боломж бүрдүүлэх талаар санал солилцож, үргэлжлүүлэн ярилцахаар боллоо.
Манай сургуулийн хувьд сурагчид маань дараагийн сургуулиа сонгох, мэргэжлээ бодитоор судлах, гадаадад суралцах боломжоо эртнээс харах шинэ боломж нээгдэж байгаа нь хамгийн чухал.
Уудам Монгол сургуульд хүрэлцэн ирсэн License Academy-ийн төлөөлөгчдөд талархал илэрхийлж, цаашдын хамтын ажиллагаанд амжилт хүсье.
