Уудам Монгол сургуулийн бага ангийн сурагчид, эцэг эх, асран хамгаалагчдын дунд жил бүр зохион байгуулдаг «Гэр бүл – хөгжөөнт өдөрлөг» өнгөрсөн амралтын өдөр амжилттай боллоо.
Бага ангийн сурагчид маань анги хамт олноороо, аав ээж, асран хамгаалагчдынхаа хамт нэг өдрийг хөгжилтэй, идэвхтэй өнгөрүүлж, хамтдаа оролцож, хамтдаа дурсамж бүтээлээ.
Энэ өдөрлөгийн гол зорилго нь хэн нэгнийг түрүүлүүлж, байр эзлүүлэхэд биш. Хүүхэд, эцэг эх, багш нар нэг баг болж оролцох, анги хамт олны уур амьсгалыг дэмжих, гэр бүлээрээ хүүхдийнхээ сургуулийн амьдралд нэг өдрийг хамт өнгөрүүлэхэд оршдог.
Тиймээс энэхүү үйл ажиллагаа нь тэмцээн, уралдааны хэлбэртэй бус бөгөөд оролцсон хүүхэд бүр, гэр бүл бүр, анги хамт олныг хамтад нь урамшуулан дэмждэг онцлогтой.
Мөн энэ жилийн өдөрлөгийн зохион байгуулалтад дунд, ахлах ангийн Нийгмийн ухааны нэгдлийн багш нар болон Сурагчдын зөвлөлийн ах, эгч нар дүү нартаа дэмжлэг үзүүлэн хамтран ажиллалаа. Бага ангийн дүү нартаа тусалж, сургуулийнхаа үйл ажиллагаанд өөрсдөө оролцож байгаа нь ч энэ өдөрлөгийн бас нэг сайхан хэсэг байлаа.
Цаашид «Гэр бүл – хөгжөөнт өдөрлөг»-өө улам сайжруулан, Уудам Монгол сургуулийн уламжлалт үйл ажиллагааны нэг болгон үргэлжлүүлэхээр зорьж байна.
Хамтдаа нэг өдрийг бүтээсэн нийт сурагчид, эцэг эх, асран хамгаалагчид, багш ажилтнууд болон Сурагчдын зөвлөлийн сурагчдадаа баярлалаа.
