Уудам Монгол сургуулийн сумо бөхийн клубын тамирчид мэргэжлийн сумо бөхийн дээд зиндаанд Маэгаширагийн 1-д эрэмбэлэгдэн барилдаж байсан Токүсэгава Б.Ганболдын нэрэмжит «TOKUSEGAWA U-15 SUMO CUP» өсвөрийн сумо бөхийн Монгол Улсын аварга шалгаруулах нээлттэй тэмцээнд оролцож байна.
Энэхүү тэмцээн нь 13, 14, 15 насны гурван ангиллаар тав дахь жилдээ уламжлал болгон зохион байгуулагдаж байгаа бөгөөд зөвхөн аварга, медальтнуудыг тодруулахаас гадна өсвөрийн тамирчдын цаашдын хөгжлийг дэмжиж, олон улсын түвшинд суралцах боломжийг нээдэг онцлогтой.
Тухайлбал, 15 насны ангилалд Япон улсын Асахигаока ахлах сургуульд сумо бөхөөр суралцах тэтгэлгийн нээлттэй сонгон шалгаруулалт зохион байгуулагддаг.
Өмнөх жилүүдэд энэхүү сонгон шалгаруулалтад Уудам Монгол сургуулиас О.Чинзориг (2019 он), А.Дэлгэрбат (2020 он), Д.Зэлмэ (2023 он), Г.Доржцэрэн (2024 он), Б.Заяамандах (2025 он) нар амжилттай шалгарч, Япон улсад суралцах боломжоо нээж байсан.
Энэ жилийн тэмцээнд манай сургуулиас бага насны ангилалд 8А ангийн сурагч Н.Ананд, дунд насны ангилалд 8Б ангийн сурагч Н.Түвшинсайхан, 9Б ангийн сурагч Т.Ирмүүн, О.Эрхэмбаяр, Д.Гарьд-Эрдэнэ нар оролцож байна.
Сумо бөх бол сахилга бат, тэвчээр, хүндлэл, өөрийгөө дайчлах чадварт суралцах, цаашлаад өөрийн хүсэл мөрөөдөлдөө хүрэх боломжийг нээдэг боловсролын нэгэн чухал хэсэг юм.
Дэвжээн дээр гарч байгаа хүүхэд бүрийн ард олон өдрийн бэлтгэл, хөдөлмөр, өөр өөрийн хүсэл мөрөөдөл бий. Тамирчин хүүхдүүддээ өөртөө итгэлтэй, зоригтой барилдахыг хүсэж, амжилт ерөөе.
