Шинэ хичээлийн жилийн анхны өдрөө баяртай мэдээгээр эхлүүлж байна.
«Уудам Монгол» сургуулийн 8б ангийн сурагч Н.Түвшинсайханд Япон Улсын сургуулиас тэтгэлэгтэйгээр суралцаж, сумо бөхөөр үргэлжлүүлэн хичээллэх албан ёсны урилга ирлээ.
Н.Түвшинсайхан нь Өвөрхангай аймгийн харьяат, аймгийн арслан Ж.Наранбаатарын хүү бөгөөд 9 наснаасаа сумо бөхөөр хичээллэж эхэлсэн. Гурван жилийн өмнө «Уудам Монгол» сургуульд элсэхдээ сургуулийн сумо бөхийн клубт тогтмол бэлтгэл хийж, цаашлаад Япон Улсад суралцан сумо бөхөөр үргэлжлүүлэн хичээллэх тодорхой зорилго, мөрөөдөлтэй ирж байлаа.
Өнөөдөр тэр мөрөөдөл нь дараагийн бодит алхамдаа хүрч байна.
Бид хүүхдийн өмнөөс мөрөөдлийг нь сонгодоггүй. Харин хүүхэд өөрийн мөрөөдлөө олсон бол түүндээ хүрэхэд нь шаардлагатай зөв орчин, зөв дадал, бодит боломжийг бүрдүүлж, тууштай дэмжих нь сургуулийн үүрэг гэж үздэг.
Түвшинсайхандаа баяр хүргэж, Япон Улсад эхлэх шинэ замнал, сумо бөхийн ирээдүйн зорилгод нь улам их амжилт хүсье.
