Уудам Монгол сургуулийн шинэ хичээлийн жил эхэлж байна. Энэ жил бидний хувьд ээлжит нэгэн хичээлийн жил биш, сургуулийнхаа хөгжлийн дараагийн үе шатыг эхлүүлж буй онцгой жил байх болно.
Бид хүүхдийн сурлагын амжилтыг чухалчилна. Гэхдээ зөвхөн сайн дүнгээр хүүхдийн хөгжлийг хэмжихгүй.
Өөрийн сонголтдоо хариуцлагатай, бусдыг хүндэлдэг, бие даан сэтгэж шийдвэр гаргадаг, алдаанаасаа суралцдаг, хийх ёстой зүйлээ бусдаар шаардуулахгүй хийдэг ЗӨВ, БИЕ ДААСАН, ТӨЛӨВШСӨН ХҮН болоход нь хүүхэд бүрийг дэмжинэ.
Сургууль бол зөвхөн мэдлэг олгодог газар биш. Хүүхэд амьдралд бэлтгэгддэг орчин байх ёстой.
Бидний асуулт үргэлж хэвээрээ байх болно — ТАНЫ ХҮҮХДИЙН МӨРӨӨДӨЛ ЮУ ВЭ?
Харин энэ хичээлийн жилд бид тэр мөрөөдөлдөө хүрэхэд нь хэрэгтэй мэдлэгээс гадна сахилга бат, хариуцлага, хүн чанар, бие даах чадварыг хамтдаа төлөвшүүлэхийг зорьж байна.
Хүүхэд бүр өөрийн гэсэн мөрөөдөлтэй. Харин тэр мөрөөдөл зөв орчин, зөв хүмүүжил, тууштай хөдөлмөрийн дунд бодит болдог.
Нийт сурагчид, эцэг эх, асран хамгаалагчид, багш ажилтнууддаа 2026–2027 оны хичээлийн шинэ жилийн баярын мэнд хүргэе.
