«Уудам Монгол» сургуулийн 2026–2027 оны хичээлийн жилийн стратеги төлөвлөгөөний хүрээнд хэрэгжүүлж буй сургалтын хөтөлбөрийн томоохон шинэчлэлийн нэг болох «Амьдралын боловсрол» хөтөлбөрийн 1–12 дугаар ангийн цогц агуулга бэлэн боллоо.
Хөтөлбөрт 1–12 дугаар ангийн 8 чиглэлийн 882 хичээл, 38 сурагч, багшийн ном, хичээл бүрийн багшийн заавар, гэрийн даалгавар бүхий сургалтын цогц материал багтсан.
Хөтөлбөр нь санхүүгийн мэдлэг, сэтгэлзүйн мэдлэг, эрүүл мэндийн мэдлэг, харилцааны мэдлэг, дижитал мэдлэг, ёс зүйн мэдлэг, карьер төлөвлөлт, иргэний оролцоо гэсэн 8 чиглэлийг хамарна.
Бид хүүхдэд зөвхөн хичээлийн мэдлэг олгох нь хангалттай биш гэж үздэг. Өөрийгөө таньдаг, сэтгэл хөдлөлөө удирдаж чаддаг, эрүүл зөв дадалтай, бусадтай зөв харилцдаг, санхүүгийн суурь ойлголттой, цахим орчинд хариуцлагатай, ёс зүйтэй сонголт хийдэг, ирээдүйн мэргэжил, амьдралынхаа талаар бодож чаддаг, нийгэмдээ оролцоотой хүн болж төлөвших нь боловсролын чухал үр дүн юм.
Тиймээс «Амьдралын боловсрол»-ыг нэг удаагийн сургалт, хүмүүжлийн ажил бус, хүүхдийг 1 дүгээр ангиас 12 дугаар анги хүртэл дагаж, нас ахих бүрд агуулга нь гүнзгийрэх цогц хөтөлбөр болгон боловсруулсан.
Нэг сэдэв 12 жилийн турш эргэн ирж, хүүхдийн нас, хөгжлийн онцлогт тохируулан шат ахин гүнзгийрэх спираль зарчмыг баримтална.
Хичээл бүр анги танхимд дуусахгүй. Багшийн заавар, сурагчийн даалгавар, эцэг эхийн оролцоогоор сургууль дээр ярилцсан зүйл гэр бүлийн орчинд үргэлжилж, хүүхдийн өдөр тутмын дадал болж хэвшихэд чиглэнэ.
Энэ бол сургуулийн стратеги төлөвлөгөөнд тусгасан «Хөтөлбөр»-ийн шинэчлэлийн нэг том алхам.
