Уудам Монгол сургууль дунд хугацааны “UUDAM MONGOL 3.0” стратеги төлөвлөгөөнийхөө хүрээнд Хөтөлбөр, Орчин, Хүний нөөцийн олон шинэчлэлийг эхлүүлээд байна.
Үүний нэг нь өдөр тутмын амьдралд шаардлагатай найман чиглэлийн мэдлэгийг олгох зорилготой “Амьдралын боловсрол” хөтөлбөр юм.
Найман чиглэлтэй энэхүү хөтөлбөрийн онцлог нь хүүхэд нас, түвшиндээ тохирсон агуулгаар өдөр тутмын амьдралд хэрэгтэй мэдлэгээ бодит сонголт, дадал, чадвар болгон хөгжүүлэхэд оршино. Өөрийгөө ойлгодог, бусадтай зөв харилцдаг, бие дааж шийдвэр гаргадаг, хариуцлагатай хүн болж төлөвшихөд нь дэмжлэг үзүүлэхийг бид зорьж байна.
Ажил мэргэжлийн замнал
“Би юунд дуртай, юу хийж сурахыг хүсдэг вэ?”
Зураг зурах дуртай хүүхэд, эвдэрсэн тоглоомоо задлан сонирхдог хүүхэд, бусдад тайлбарлаж өгөхдөө баярладаг хүүхэд. Өдөр тутамдаа сонирхон хийдэг зүйлсээсээ хүүхэд өөрийнхөө тухай олон зүйлийг олж мэддэг. Тэр сонирхлоо туршиж, чадвараа хөгжүүлж, өөр өөр ажил мэргэжилтэй танилцах нь ирээдүйн сонголтоо бодож хийх эхлэл юм.
Хүүхдүүд нас, түвшиндээ тохирсон агуулгаар өөрийн сонирхол, давуу тал, хөгжүүлэх хэрэгтэй чадвараа таних, төрөл бүрийн ажил мэргэжлийн онцлог, хүмүүст үзүүлдэг ач тусыг ойлгох, зорилгоо тодорхойлж түүнд хүрэх жижиг алхмуудаа төлөвлөх, суралцах болон ажил мэргэжлийн боломжуудын талаар мэдээлэл цуглуулж, харьцуулан сонголт хийхэд суралцана.
Бид хүүхэд өөрийгөө таньж мэдэхийг эрмэлздэг, бусдын хөдөлмөрийг хүндэтгэдэг, ирээдүйн сонголтоо мэдээлэлд тулгуурлан хийдэг, зорилгынхоо төлөө суралцаж хичээдэг хүн болж төлөвшихөд нь дэмжлэг үзүүлэхийг зорьж байна. Өнөөдөр сонирхон хийж үзсэн зүйл ирээдүйн боломжоо танихад тусалдаг.
Гэртээ хүүхэдтэйгээ сонирхлынх нь тухай ярилцаад үзээрэй: “Чи ямар зүйл хийхдээ хамгийн их дуртай байдаг вэ? Тэрийгээ илүү сайн хийж сурахын тулд юунаас эхэлж болох бол?”
